Moldova seçimneri kim kazanacek acabaGg Ii Bbj d34 P ി.o X5 Phu Jt U YyJj v 1 TCL12
Moldova seçimneri kim kazanacek acaba
Merkez Seçim Komisiyası (MSK) açıkladı, ani Moldova Parlamentinä seçimnerindä pay almaa hak 11 partieya, bloka hem cümne-politika akıntılarına verildi. Bundan kaare seçimnerdä 12 baamsız kandidat da pay alacek.
Parlamentä geçmää zoor olacek. Kendiniz sayın: baamsız kandidatlar seçimnerdä pay alan insannarın en aazdan 3% oylarını kazansınnar lääzım, partiyalar – en aazdan 6%, çift partiyadan kurulan bloklar – 9%, üç yada üçtän zeedä patiyadan kurulan bloklar – 12%.
Aklınıza getireriz, ani geçän sefer olan seçimnerdä Parlamentä sade iki partiya hem bir blok geçäbildiydi: Moldova komunist partiyası – 50,7%, blok “Bragiş Alyansı” – 13,36%, Hristian-demokratik partiyası (eski halk frontu) – 8,24%. Kalan 27,7% onnar aralarında payettilär. Nedän sora komunistlär Parla-menttä majoritar partiyası oldular.
Şindiki seçimnerä bir afta kaldı. Ortalık kaynêêr. Seçimnerdä pay alan kandidatlar biri-birlerinin üst-lerinä türlü kompramatlar dökerlär, kanonsuz adımnarda biri-birilerini kabaatlı bulêrlar. Yavaş-yavaş Moldovada büük bir seçim yangını kızışêr. O yangının kıvılcınnarı diil salt komşulara ama taa Amerikaya etişti artık.
İlkin Moldovadan Rusiyaya birkaç rus vatandaşını kırlattılar, kabaatlı bulup, ani onnar, seçimdä pay alan bir partiyaya, izinsiz yardım ederlär. Sora da Rusiyayı Moldovanın iç işlerinä karışmakta kabaatlı buldular. Rusiya, çok beklämedään, korkuttu, ani Moldovaya karşı ekonomika sankşiyaları kullanacek (gazı dünnä paalarına görä satacek, viza rejimı koyacek h.b.)
Bunun ardına Rusiyada işleyän Moldova vatandaşları Moskvada kendi Kongresını topladılar. Kongres danıştı Rusiya öndercilerinä ki sankşiyaları kullanmasınnar.
Birkaç gündän sora Moldovada iki rus vatandaşını kapadılar. Onnarda yarım milion dolar yakın para bulundu. Sayılêr, ani bu parayı seçim için kullanaceydılar.
Bu afta Kişinövda iki kvartirada “Molotov kokteli” dolu şişelär buldular. O türlü şişeleri 1992-ci yılda olan Moldova–Pridnestrovye cengindä kullanardılar. İçişleri bakannıı açıkladı, ani Moldovada teraktlar hazırlanêr. Taa o avşam Moldovada ORT-1 kanalı bildirdi, ani teraktları kombatantlar (o cenktä pay alan veterannar) hazırlarmışlar. Ertesi günü kombatantlar, basın toplantısı yapıp, bu işin bir provokaşiya olduunu açıkladılar.
Kıvılcınnar Amerikaya da etiştilär. Amerika senatorları Moldovada seçimnerä hazırlanmak durumu için bir açıklama yaptılar. Amerika prezidentı Georg BUSH da kalmadı bir tarafta. Sloveniyanın baş kasabasında konuşmasında o dedi, ani “On gündän sora Moldova vatandaşları, gidip seçim bölümnerinä, kendi demokratik potenşialını kullanmaa deyni şans kabledeceklär”.
Kalmêêr bir tarafta Evropa Birlii dä. Onnar birkaç üz kişi gözlemci olarak burayı yollêêrlar. Söz gelişi BDT-dan (Baamsız Devletlär Topluluu) seçimnerdä gözlemci olmayacek. Moskva deer, ani onnarı çaarmamışlar. Kişinöv deer, ani onnar akredetaşiya istämemişlär.
Nicä dä olsa bir iş belli: düüş keskin olacek. Kim kazanacek belli diil. Bir soruş açık: dört yıldan sora Moldovada durum diişti mi acaba? Cuvabını pazara alacez.